Momy czwortek. Wczorej, we kościele farorz posypoł mie popiołem. Zaczon sie Wielki Post. Siadom do mojigo laptopa i czuja, że musza cosik napisać. Łobiecoł żech przeca. Ino – jakbych na to niy spojrzoł – niy wiem co.
Łod poru dni, beztóż że mom Internet (dziynka Bogu), czytom ło farorzach, kierzy wzieni udział we Powstaniach i w Plebiscycie. Niekierych znołżech. Godali ło nich ksiądz Dola i Biskup Kopiec we seminarium, kiej uczyli nos o Historii Kościoła. Innych znom ino ze słyszenio, abo lepiyj pedzieć – z widzynio – przeca niyjedno droga na Śląsku mianuje się ich imieniym. Ale musza pedzieć, choć to gańba, żech się nigdy nie zainteresowoł bezcóż wtoś wymyślył, coby ich mianem nazywać ulice.
Znolyźć miyndzy nimi można i znanych i nieznanych, błogosławionych, kierych kościół wyniósł na ołtarze, posłów do sejmu, prałatów, kanoników, dochtorów teologii, farorzy i kapelonków. Wszyscy łoni chcieli ino służyć Bogu i Polsce.
No ja. Trza pedzieć, że po prowdzie niy wszyscy. Byli i tacy, kierzy chcieli Śląsk przyłonaczyć do Niemców. Ale tyż trza pedzieć, że to nie było tak leko, jak to się terozki niewtorzy myślą. Sam, na Śląsku miyszkali różni ludzie. Wszyscy byli Ślązokami, ale jedni barzyj godali i czuli po polsku, a drudzy – po niymiecku. Skuli tego farorzem na Śląsku niy mógł być kożdy. Biskupi wrocławscy, kierzy wiedzieli ło tyj śląskij specyfice, posyłali sam ino takich, kierzy godali perfekt i po polsku i po niymiecku. Inaczyj się niy dało.
Ale dzisiej chca godać ło tych, kierzy skuli tego jaki ich w chałupie wychowali, kierzy skuli tego jak czuli i myśleli, stanyli ze tymi, kierzy chcieli coby Śląsk stoł się czyńściom Polski. Dzisiej chca godać ło tych, kierzy rzykali z tymi, kierzy poszli do powstanio.
Kożdy z tych farorzy służył. Nojprzód Bogu, bo tak się przygodzi, coby ksiądz śpiywoł mszo, słuchoł grzychów we słuchatelnicy i godoł kozania. I tak robili. Rzykali z ludźmi w kościołach na parafii, ale poradzili tyż pójść miyndzy powstańców i być s nimi. Ci, kierzy szli z powstańcami niy mieli na to papiorów łod biskupa czy z kurii. Łoni wiedzieli, że trza z tymi chopami być i rzykać, to szli i rzykali. Niy roz na krótko. Niy roz ino „przy okazji”. Niy chcieli, co by ich kamraci i parafianie łostali bez sakramentów i szli służyć Bogu, łonym, a bezto – Polsce.
Ale to niy było wszystko. Ci farorze poradzili zajmować się tyż rannymi, ich familiami, tymi, kierzy uciekali ze niymieckij strony. Łodprawiali pochowki tych, kierzy zginyli, dowali znać familiom co u walczących…
Dzisiej, kej mijo sto lot łod tego wszystkiego, czytom jak żyli, na zdjyńciach, kiere są w Internecie widza jak wyglądali i czuja się zobowiązany ich życiym, ich służbom i ich łodwagom.
Im wiyncyj się ło nich dowiaduja, tym barzyj widza co znaczy pedzieć ło kimś „kapelan”. Czuja to mocno, bo pora miesiyncy nazod dość lekkoch pedzioł komyndantowi: „ja, zgodzom się”. Wtedy żech myśloł, że to nic takigo, że wiym co to znaczy. Dzisiej wiym wiyncyj. Mom być tym, kim dla chopów z powstania byli farorze: Brandys, Opiełka, Woźniak i wszyscy inni. Mom być recht farorzem, kiery bydzie rzykoł i głosiył Ewangelia.
Myśla se, że naszo śląsko pobożność, kiero tak mocno przaje patronce grubiorzy, św. Barbarze, św. Józefowi Rzemieślnikowi, Maryi z Piekor i świyntyj Annie, jest czyńściom bycia Ślązokiem. Tym naszym śląskim rzykaniem mogymy się podzielić z kożdym z wos. Jest kąskiem tego, co chcymy wom w czasie naszygo Zlotu pokozać. Jest to ino kąsek, bo niy do się pokozać wom wszystkiego. I niy mo to związku z koronawirusem.
Niy do sie na zlocie łoddać tego, jak wyglondo Barbórkowo Msza, z fanami, z grubiorzami w mundurach i orkiestrom dyntom. Niy ma jak na zlocie poczuć atmosfery pąci chopów do Piekor w łostatnio niedziela maja, czy procesji światła z kalwaryjskich łobchodów. Ale i tak was zaproszomy. Przyjedźcie do nos i dejcie się poczuć choć trocha z tego wszystkigo.
Zawierzcie się Pani Piekarskiej w Jej Sanktuarium, idźcie do druha Wicka w kościele na piekarski Kalwarii, łobejrzyjcie łobroz świyntyj Barbary na cechowni w Guido i idźcie do Omy (Starki) Pana Jezusa we Świętej Annie.
Jako kapelan Zlotu, łobiecuja wom, co byda za wos rzykoł przez przyczyna świyntyj Jadwigi Śląskij, patronki mojej fary i z serca wom błogosławią.
Ks. Phm. Karol Darmas
Kapelan Zlotu